އަދަކު ސަލާމަތެއް ނެތެވެ. ފޯނު ބަލާލިއިރު ރައްޓެހިން މިވާހަކަ އެވެ. ގެއަށް
އައިތަނުން އަނބިގޮއްޔެވެސް ހަމަ މިވާހަކައެވެ. ހިތައް އެރިއެވެ. އަނހާ
ސަހަރޯއެވެ. މިޖެހުނީ ބޯކަޅު ކުރާށެވެ. ކުޑަކޮށް ހެވުނެވެ. ރައްޓެއްސަކު
ބުނެލިބަހަކުންނެވެ. "މިހުރިހާ ދުވަހު މިކަން ހަރާމްވެގެން ނުކޮށްހުރެ ހުރެ
ބޮލުގެ ފަތްކޮޅުގޮސް ތަލަވިފަހުން މި ލިބުނީ ހުއްދައެވެ." ވެގެން އުޅޭގޮތް ހެއްޔެވެ؟ އިސްތަށިގަނޑުގައި
ކަޅު ކުލަ ޖެއްސުމަކީ ހުއްދަ ކަމެއް ކަމަށް ރާއްޖޭގެ އިސްލާމީ ފަތުވާދޭ އެންމެ
މަތީ މަޖިލީހުން ނިންމީއެވެ.
އަޅުގަނޑުގެ ފިކުރު ދުއްވައިގަތީ މުޅުން އެހެން ދިމާލަކަށެވެ. މީގެ 15-12
އަހަރު ކުރިއެވެ. ރާއްޖޭގައި އެތަކެއް ގަރުނަކު ދެމިގެންދިޔަ ނަމާދު ކުރުމުގައި
"ބޮޑު ގޯހެއް" އޮވެގެ އިސްލާހުކުރި ދުވަސްކޮޅެވެ. ފަތިސް ނަމާދު
ގުނޫތެވެ. ޚިޔާލު ދެކަފިވެ، ބައެއް ރައްރަށުގައި ގުނޫތުކިޔާ މިސްކިތާއި
ގުނޫތުނުކިޔާ މިސްކިތް ފެނިގެން ދިޔައެވެ. އަދި ގުނޫތު ކިޔާ މީހުންގެ ނަމާދު
ބާތިލު ހުކުމްކުރި ބަޔަކުވެސް ތިއްބެވެ. އެބަހުސުގައި އިލްމުވެރިންގެ ތަފާތު ރައުޔު
އަޑުއިވުނެވެ. ދުވަސް ކޮޅަކުން އެފަދަ ބޭފުޅަކު، އެއަކީ އޭގެ ގޮތުގައި މާބޮޑު މައްސަލައެއް
ނޫންކަމާއި، ގުނޫތު ކިޔާމީހާގެ ފަހަތުގައި ކުރާއިރު ރަނގަޅީ އިމާމާއާއި ތަބާވުން
ކަމަށް ބުނިއަޑުވެސް އެހީމެވެ. ހިތައްއެރިއެވެ. އެހެން އެކަން އޮއްވާ އެތައް ބޮޑު
ނުރުހުމަކާއި ނަފުރަތުގެ ކަންތައްގަނޑެއް މިފެށީ ކޮންކަމަކާބާއެވެ.
ބޮލުގައި ކުލަޖެއްސުމުގަވެސް މިވީ އެކަހަލަ ގޮތަކަށެވެ. މިއަދާހިސާބަށްވެސް
ބޯކަޅު ކުރުން "ހަރާމް ކުރާ" އަދި "ހުއްދަ ކުރާ" ބަޔަކު
ތިއްބެވެ. ކޮންމެ ބަޔަކުވެސ އެބައެއްގެ ކޮޅަށް ރައުޔު ނެރެމުން އައީއެވެ. އަދި
ތިމާ ނުރުހޭ ކޮޅު ގޯސް ކުރާ ބަޔާކާއި، ފާފަވެރި ކުރާބަޔަކު ތިބި އިރު ފާސިގުކޮށް
ކާހަރަކުރާބަޔަކުވެސް ތިބީއެވެ.
ހިތަށް އެރިއެވެ. ވިސްނާލާކަށް ނުވޭހެއްޔެވެ؟ އަޅުގަނޑުމެންނަކީ އިލްމު މަދު،
ނުދަންނަ އިންސާނުންތަކެކެވެ. ވީއިރު، ތިމާ ދީނީ ކަމަކާއި މެދު ދެކޭގޮތް ނޫން
ކޮންމެ ގޮތަކަށް އުޅޭ، ނުވަތަ ގަބޫލުކުރާ މީހުން ، ފާސިގުން ، ލާދީނީން އަދި
ކާފަރުންނަށް ހެދުން ހުއްޓާލާކަށް ނުވޭބާއެވެ. މިއަދު އެއޮތީ މިޤައުމުގެ އިސްލާމީ
ޢިލްމުވެރިންގެ މަޖިލިސްގެ ފަތަވާނެރެފައެވެ. ކުރިން ބޮލުގައި ކަޅުކުލަޖެއްސުމުން
ކުރި ފުރައްސާރަ އަށް ހިތާމަނުކުރާނެބާއެވެ.
އެކުވެރިޔާ ބުނިހެން، ބޯތަލަވެ، އަދަކު އޭނަގެ ބޮލަކު
ކަޅުކުރާނެއެއްޗެއްނެތެވެ. އެހެނެއްކަމަކު ބޮލުގެ ތެރޭ އޮތް އެއްޗެގެ ބޭނުންކުރަމާ
ހިނގާށެވެ. ދީނީ ކަންކަމުގައި، ތިމާއަށް އިނގޭ ގޮތް ނޫންގޮތް ހުރެދާނެކަމާއި،
ކޮންމެ އިންސާނަކީވެސް އިލްމުގައި އުނި މީހެއްކަން ހަނދާންކޮށްލަމާހެއްޔެވެ.
ކަމެއްވާއިރަށް މީހުންނަށް ލާދީނީއަށް، ކާފަރަށް މަލްއޫނަށް ނުގޮވުމުން، ބޯކަޅު ނުކުރެވުނަސް ބޮލުތެރޭ ހުރިއެއްޗެއްގެ
ބޭނުންހިފާމީހަކަށްވެވިދާނެއެވެ.